ஒரு சமயம் விநாயகர், முனிவர்களுக்குத் தொல்லைக் கொடுத்து வந்த கேசி என்னும் அசுரனை அழிக்க, இத்தலத்தில் லிங்க பிரதிஷ்டை செய்து வழிபட்டுச் சென்று அவனை வென்றார். விநாயகர் பிரதிஷ்டை செய்து வழிபட்டதால் இத்தலம் 'அநேகதங்காவதம்' என்று அழைக்கப்படுகிறது. விநாயகருக்கு அநேகதங்காவதர் என்று ஒரு பெயர் உண்டு. இமயமலையில் ஒரு அநேகதங்காவதம் உள்ளதாலும், இது கச்சியம்பதியில் உள்ளதாலும் 'கச்சி அநேகதங்காவதம்' என்று வழங்கப்படுகிறது.

மூலவர் 'அநேகதங்காவதேஸ்வரர்' பெரிய லிங்க வடிவில் காட்சி அளிக்கின்றார். அழகான மூர்த்தி. காஞ்சிபுரத்தில் 'காமாட்சி' அம்மனுக்கு தனிக் கோயில் உள்ளதால் இங்கு உள்ள எந்த சிவன் கோயிலுக்கும் அம்மன் சன்னதி கிடையாது.

ஏக பிரகாரமான இக்கோயிலில் பிரகாரத்தில் விநாயகப் பெருமானும் மிகப் பெரிய திருவுருவில் தரிசனம் தருகின்றார். வள்ளி, தேவசேனா சமேத சுப்பிரமண்யரும் தரிசனம் தருகின்றார்.

சுந்தரர் ஒரு பதிகம் பாடியுள்ளார். இக்கோயில் காலை 8.30 மணி முதல் 11.30 மணி வரையிலும், மாலை 4 மணி முதல் 5.30 மணி வரையிலும் நடை திறந்திருக்கும்.